147. பண்டையக் கால இந்தியா – ஒரு வரலாற்றுச் சித்திரம்

மானமுள்ள‌ அறிவார்ந்த சமூகமாக இம்மண்ணை மாற்ற முதலடி எடுத்துக் கொடுத்த‌ புத்தனுக்குச் சமர்ப்பணம்.

It is important to bear in mind that political campaigns are designed by the same people who sell toothpaste and cars.
– Noam Chomsky

எங்கும் இல்லை
என் மூதாதையின் பெயர்
நீ எழுதிய வரலாறு.
– கவிஞர் மகுடேசுவரன் (‘மண்ணே மலர்ந்து மணக்கிறது’ நூலிலிருந்து)

கவிஞர் மனுஷ்யபுத்திரன் சொன்னது போல் வரலாறு என்பது ஒரு பைத்தியக்கார விடுதி. பெரும்பாலும் யார்யாரோ அவரவர் மனம்போன போக்கில் கிறுக்கி இருக்கிறார்கள். தீபாவளி – சமணர்கள், பாபர் மசூதி – கபீர்தாசர், விநாயகர் சதுர்த்தி – மும்பாதேவி என்று இன்றைய நிலைக்கு ஏற்றாற்போல் என்னிடம் பல உதாரணங்கள் இருந்தாலும், வேறு சில‌ உதாரணங்கள் விளக்கிச் சொல்கிறேன்.

இந்தியச் சுதந்திரத்திற்குப் பின் இந்து முஸ்லீம் கலவரம் நாடெங்கும் பரவுகிறது. அதில் அதிகம் பாதிக்கப்பட்ட வங்காளம் செல்கிறார் காந்தி. வங்காள முதல்வர் சூராவர்தியின் (Huseyn Shaheed Suhrawardy) வீட்டில் தங்குகிறார். ஒரு முஸ்லீம் வீட்டில் காந்தி தங்கக் கூடாது என்று இந்து மதவாதிகள் எதிர்க்கின்றனர். அப்படி ஒரு கும்பலில் இருந்து, கலவரத்தில் நடந்த அனைத்து வன்கொடுமைகளுக்கும் கொலைகளுக்கும் பொறுப்பேற்கச் சொல்லி, ஹேராம் திரைப்படத்தில் சூராவர்தியைப் பார்த்து கமலஹாசன் குரல் கொடுப்பார். காந்தி அதற்குப் பதில் சொன்ன பின் கும்பல் கலையும். வங்காளக் கலவரத்தின் பழியைச் சூராவர்தியின் மீது வரலாறு சுமத்திப் போனது. வங்காளத்தின் நீரோ என்று அழைக்கப்பட்டார். சில நாட்களுக்கு முன் வங்காள அரசின் சில பழைய ஆவணங்கள் பொது மக்களின் பார்வைக்குத் தரப்பட்டன. கலவரத்தைத் தடுக்க சூராவர்தி மேற்கொண்ட அனைத்து சீரிய முயற்சிகளும் வெளிச்சத்திற்கு வந்தன. அவர் நீரோ இல்லை!

பேரரசர் அசோகரை நமக்கு எல்லாருக்கும் தெரியும். கலிங்கத்துப் போருக்குப் பின் அவர் அகிம்சை வழியேந்தி புத்த மதத்திற்கு மாறிய கதையும் தெரியும். இந்தியத் தேசிய சின்னமான நான்கு தலைகள் சிங்கம் அவர் தந்தது. கஷ்மீர் வரை பேரரசை விரிவுபடுத்தி ஸ்ரீநகரை உண்டாக்கியவர் என்று கஷ்மீரின் வரலாறு சொல்லும் கல்ஹனா சொல்கிறார். இலங்கையின் வரலாற்றுக் காவியமான மகாவம்சத்திலும் இவர் உண்டு. அப்படிப்பட்ட பேரரசர் அசோகர் சுமார் 100 வருடங்களுக்கு முன்பு வரை புராணங்களில் அபூர்வமாகக் குறிப்பிடப்படும் ஒரு சாதாரண மவுரிய அரசராக மட்டுமே இருந்தார் என்றால் நாம் எளிதில் நம்ப மாட்டோம். ஆனால் அதுதான் உண்மை! ஸ்ரீந‌கர் செய்த அசோகரும், புத்த மதத்திற்கு மாறிய அசோகரும் ஒரே ஆள் இல்லை என்று சில நாட்களுக்கு முன் ஒரு புத்தகம் வெளியானது. அதாவது ஒரு பேரரசர் மதம் மாறவில்லை என்கிறது அப்புத்தகம். கிபி 1956ல் நாக்பூர் நகரில் தனது ஆதரவாளர்கள் கிட்டத்தட்ட 5,00,000 பேருடன் புத்த மதத்திற்கு மாறிய அம்பேத்கர் கதையையே திரித்துக் கூறிக்கொண்டு இருக்கிறார்கள். கிமு காலத்து அசோகர் கதை எந்த மூலை? ஆரியர்கள் இந்தியாவில் இருந்து மேற்கு நோக்கி ஈரான் வழியாக ஜெர்மன் வரை நகர்ந்தார்கள் என்று இந்நாள் வரை சொல்லப்பட்ட கருத்துக்களை எல்லாம் தாண்டி, ஆர்க்டிக் வரை சென்றார்கள் என்கிறது அப்புத்தகம். இடதுசாரிகளாலும் மதச்சார்பற்றவர்களாலும் திரித்துக் கூறப்பட்ட இந்திய வரலாற்றை இதுபோன்ற புத்தகங்கள் சரி செய்யும் என்று அப்புத்தகத்தை வெளியிட்டு மத்திய அமைச்சர் வெங்கையா நாயுடு பேசினார். அசோகர் அகிம்சை ஏற்று அதைப் பரப்பியதால் தான் ஆண்டாண்டு காலமாக இந்திய தேசம் வீரமற்று அடிமைப்பட்டுக் கிடந்ததாகச் சொல்லித் தரும் கல்விக் கூடங்களும் இதே மண்ணில் உண்டு. போர் அறின் வாடும் பொருநர்சீர்!

தெற்காசியாவின் மிகப் பழமையான நாடு நேபாளம். உலகின் ஒரே இந்து நாடாக நீண்ட காலமாக இருந்து வந்த நேபாளம், மக்கள் கிளர்ச்சி மூலம் மன்னராட்சி ஒழித்து மக்களாட்சிக்கு மாறியது. இந்துக்களின் புனிதத் தலங்கள் ஐந்தில் ஒன்றைக் கொண்ட நேபாளம், சமயச் சார்பற்ற நாடானதைப் பாஜக எதிர்த்தது. எதிர்மறை வளர்ச்சி (negative development) என்றார் ஜஸ்வந்த் சிங். இந்து மதத்தில் இல்லாத மத நல்லிணக்கமா என்று கேட்டார். சில நாட்களுக்கு முன் தன் முதல் அரசியல் சாச‌னத்தைப் பிரகடனப்படுத்திய நேபாளம் மீது, 31% மக்களால் தேர்தலில் மக்களாட்சி முறைப்படி தேர்ந்து எடுக்கப்பட்ட‌ இந்தியாவின் பாஜக அரசு பொருளாதாரத் தடை விதித்தது. அந்நாட்டின் துணைப் பிரதமர் சமாதானம் பேச இந்தியா வந்து வெறுங்கையுடன் நேற்றுத் திரும்பிப் போனார். ஒரு புண்ணியத் தலம் கொண்ட நேபாளத்திற்கே இந்த நிலைமை என்றால், மீதி நான்கு புண்ணியத் தலங்களைக் கொண்ட இந்தியாவில் மக்களாட்சியின் நிலை?

அய்யோ, பைத்தியம் பிடிப்பது போல் இருக்கிறதா? வரலாற்றின் பல புரட்டுக் கதைகளில் நாம் எல்லாரும் இப்படித்தான் சிக்குண்டு கிடக்கிறோம். இந்தப் பைத்தியக்கார விடுதியை எப்படி எதிர்கொள்வது என்று இதோ நான் கண்ட புத்தகம் ஒன்றை உங்களுக்கும் சொல்கிறேன்.
——————————————————————————————————————————————————————————————–
புத்தகம்: பண்டையக் கால இந்தியா – ஒரு வரலாற்றுச் சித்திரம்
ஆங்கிலத்தில்: Ancient India in historical outline
ஆசிரியர்: டி.என்.ஜா (Dwijendra Narayan Jha)
தமிழில்: அசோகன் முத்துசாமி
வெளியீடு: பாரதி புத்தகாலயம், தேனாம்பேட்டை, சென்னை
முதல் ஈடு: டிசம்பர் 2011
பக்கங்கள்: 235
விலை: ரூபாய் 140
வாங்கிய இடம்: நினைவில்லை
——————————————————————————————————————————————————————————————–
பேராசிரியர் டி.என்.ஜா அவர்கள் 1979ல் இந்திய வரலாற்றுப் பேரவையின் (Indian History Congress) பண்டைய இந்திய வரலாற்றுத் துறைத் தலைவராகவும், 1985 முதல் 1988 வரை அதன் பொதுச் செயலாளராகவும் இருந்துள்ளார்.

பண்டையக் கால இந்தியா. ஒரு வரலாற்றுச் சித்திரம். ஹரப்பா நாகரிகம், ஆரியர்களின் இனக் கோட்பாடு, வேத காலம், கிழக்கு நோக்கி நகர்வு, ஆணாதிக்கச் சமூகம், பிறப்பில் சாதிகள் பிறப்பு, பலி கொடுக்கும் வழிபாட்டு முறை, உபநிஷதங்கள், ஆசிரம முறை தோற்றம், மதரீதியான அதிருப்தி, சமணம், பவுத்தம், நிலப்பரப்பின் அடிப்படையில் அரசுகள் தோற்றம், அலெக்சாண்டர் படையெடுப்பின் தாக்கம், முதல் பேரரசான மவுரியப் பேரரசு, குஷானர்கள், குப்தர்கள் வரை நீள்கிறது இப்புத்தகம். இன்னுமொரு வரலாற்றுப் புத்தகம் என பின்னங்கால் பிடறிபட ஓடத் தேவையில்லை. வருடங்களையும் மன்னர் வாரிசுகளையும் போர்களையும் பட்டியலிட்டு சலிப்பூட்டும் மற்ற வரலாற்றுப் புத்தகங்கள் போல் இல்லை இது. அரச பரம்பரை வரலாறு இந்நூலின் முதன்மையான அக்கறை இல்லை எனினும், அது குறித்து விரிவாக விளக்கப்பட்டு உள்ளது. பேரரசுகளின் தோற்றமும் வீழ்ச்சியும் அவற்றின் பொருளாதாரப் பின்னணியில் விளக்கப்பட்டு உள்ளன. தேசியவாத வெறிபிடித்த திரிக்கப்பட்ட‌ வரலாற்றின் அபாயங்களைத் தவிர்ப்பதற்கு இப்புத்தகம் முயன்றிருக்கிறது. விடுதலைப் போராட்டத்தின் போது தேசியவாத வெறியுணர்வு கொண்டவர்களால் எழுதப்பட்ட கட்டுக்கதை வரலாறுகளை மறு ஆய்வு செய்கிறது. பொற்காலம் (acha din – அச்சா தின்) என்று நமக்கு சொல்லித் தரப்பட்ட ஆட்சிகளைப் புரட்டுக் கதை என்கிறது இப்புத்தகம்.

பண்டைய இந்தியப் பரப்பைச் சுற்றிக் காட்டும் இப்புத்தகம், பொருளாதாரத்தால் ஏற்பட்ட சமூக மாறுதல்கள், மோதல்கள், சுரண்டல்கள், மதம் மற்றும் மூட நம்பிக்கைகளின் சமூகப் பாத்திரத்திற்குச் சிறப்புக் கவனம் அளித்திருக்கிறது. நமது நிகழ்காலப் பிரச்சனைகளும் கிட்டத்தட்ட அதே காரணிகளின் அடிப்படையில் அமைவதால், புத்தகத்தில் இருந்து சில வரிகள் சாய்ந்த எழுத்துக்களில் உங்களின் வாசிப்பிற்கு:

ஓர் இந்து மதவாதியிடம் அவரது முன்னோர்கள் அனைவரும் இறந்தவர்களை எரிக்கும் வழக்கத்தைக் கடைப்பிடிக்கவில்லை என்று கூறினால், அவர் நம் குரல்வளையைக் கடித்துக் குதறிவிடுவார்.

இந்தியர்கள் தங்களை எப்போதுமே இந்துக்கள் என்று அழைத்துக் கொண்டதில்லை. முதலில் அரேபியர்களாலும் பின்னர் மற்றவர்களாலும் பயன்படுத்தப்பட்ட இந்து என்கிற சொல் அல்-ஹிந்தில் (இந்தியாவில்) வாழ்பவர்களைக் குறிப்பதாகும். இந்திய இலக்கியத்திற்கு அந்நியமான இந்தப் பெயர் பின்னர்தான் இந்தியப் பெயரகராதியில் இடம் பெற்றது. – எந்தவொரு சமஸ்கிருத இலக்கியத்திலும் இந்து என்ற வார்த்தை இல்லை என்று அம்பேத்கர் சொல்லி இருக்கிறார்.

கிமு ஆறாம் நூற்றாண்டில் கங்கைச் சமவெளியில் பல புதிய மத அறிஞர்கள் தோன்றினர். அவர்கள் வேத மதத்திற்கு எதிராகப் பிரச்சாரம் செய்தனர். பவுத்த நூல்கள் 62 மதப்பிரிவுகள் பற்றிக் குறிப்பிடுவதிலும், சமண நூல்கள் 363 மதப்பிரிவுகள் பற்றிக் குறிப்பிடுவதிலும் வியப்பில்லை. வட இந்தியாவில் நிலவிய இந்த அனைத்து மதப் பிரிவுகளிலும் பவுத்தமும் சமணமும் மட்டுமே மதங்களாக நிலைத்து நின்றன. இரண்டு மதங்களுமே வேதங்களின் அதிகாரத்தை மறுத்தன. – சமணர்கள் பெரும் எண்ணிக்கையில் தமிழ் மண்ணில் வாழ்ந்ததற்குப் பல சான்றுகள் உள்ளன. அவர்களைக் கழுவில் ஏற்றிக் கொன்ற சித்திரங்களை மதுரை மீனாட்சி அம்மன் கோவிலிலும் ஆவுடையார் கோவிலிலும் காணலாம். தேவாரம் பாடிய திருநாவுக்கரசரே ஒரு காலத்தில் சமண மதத்தில் இருந்தவர்தான். சமூக ஆர்வலர் அ.முத்துகிருஷ்ணன் நடத்தும் ‘பசுமை நடை’ என்ற அமைப்பு இன்னும் நிறைய சான்றுகள் சொல்லும். இன்று தாழ்த்தப் பட்டவர்களாகச் சொல்லப் படுபவர்கள் எல்லாம், ஒரு காலத்தில் பவுத்த மதத்தில் இருந்தவர்கள் என்று அயோத்திதாசர் சொல்லி இருக்கிறார்.

பிற உயிர்களைக் கொல்லக் கூடாது என்று பவுத்தம் தெளிவாகக் கட்டளையிட்ட போதும், பவுத்தரல்லாதவர்கள் தரும் பட்சத்தில் இறைச்சி உண்பதிலிருந்து அது தன்னுடைய ஆதரவாளர்களைத் தடுக்கவில்லை. – சமணமத‌ம் தவிர அசைவ உணவைக் கட்டாயமாகத் தவிர்க்கச் சொன்ன இவ்வுலக மதம் எதையும் நான் கேள்விப்பட்டது இல்லை. புத்தர் எப்படி இறந்தார் என்று உங்களுக்குத் தெரியுமா?

பவுத்த ஜாதகக் கதைகளில் ஒன்றான தசரத ஜாதகத்தில் சீதையின் சகோதரன் மற்றும் கணவனாகக் குறிப்பிடப்படும் ராமன் காசியின் அரசன் என்று சித்தரிக்கப்படுகிறான். இராமனின் நவீன காலப் பக்தர்கள் எந்த அயோத்தியின் மத்திய காலத்தைச் சேர்ந்த ஒரு மசூதியை இடித்து நாட்டைப் பெரும் மதப் படுகொலைகளுக்கு இட்டுச் சென்றார்களோ, அந்த அயோத்தியின் அரசனல்ல அவன் என்று அந்நூலின் மூலம் தெரிய வருகிறது.

நான்கு சாதிகளையும் சேர்ந்தவர்களை ஒரு நிலத்தில் குடியேற்ற‌, தாழ்த்தப்பட்ட சாதியினர் எங்கு அதிகமாக இருக்கிறார்களோ அந்த இடம் சிறந்தது. ஏனெனில் அது அனைத்து வகையான சுரண்டலையும் அனுமதிக்கும்.
– சாணக்கியர் என்ற கவுடில்யர் என்ற விஷ்ணுகுப்தர்

சுதந்திரமான இனக்குழுக்களைத் திட்டமிட்ட வகையில் சிதறடிப்பதற்கான வழிமுறைகளுக்கு என கவுடில்யர் என்ற சாணக்கியர் ஒரு முழு அதிகாரத்தையே ஒதுக்கி இருக்கிறார். – அதனால் தான் நமது ஆட்சியாளர்களுக்குச் சாணக்கியரைப் பிடித்திருக்கிறது போலும்!

மதுரா பகுதியில் ஹெராக்லீஸ் என்கிற தெய்வம் வழிபடப் பட்டதாகவும் கிரேக்கப் பயணி மெகஸ்தனீஸ் சொல்கிறார்.

பிராமணர்கள் ஐந்து அறைகள் கொண்ட வீடும், சத்திரியர்கள் நான்கு அறைகள் கொண்ட வீடும், வைசியர்கள் மூன்று அறைகள் கொண்ட வீடும் கொண்டிருக்க வேண்டும் என்று வராகமிஹிரர் கூறுகிறார். – பெரும்பாலும் தாழ்த்தப்பட்டவர்கள் வீடுகளில் பின்வாசல் இல்லாததைக் கிராமப்புற‌ங்களில் இன்றும் காணலாம்.

பிராமணர்களை ஒரு தராசினால் சோதிக்க வேண்டும். சத்திரியர்களை நெருப்பாலும், வைசியர்களை நீராலும், சூத்திரர்களை விஷத்தாலும் சோதிக்க வேண்டும் என்று சட்ட நூல்கள் விதித்துள்ளன. – விஷத்தால் உயிர் போய்விடும் என்பதால், சமீப காலமாக மலத்தால் சோதிக்கப்பட்ட நிகழ்வுகள் ஏராளம்.

வருணத்தால் பிரிக்கப்பட்டிருந்த சமுதாயத்தைப் பாதுகாப்பதற்காக மதம் ஒரு கருவியாகப் பயன்படுத்தப்பட்டது. மேல் வர்க்கங்களுக்கு வரலாற்றின் எல்லாக் காலங்களும் பொற்காலங்களே. ஆனால் மக்களுக்கோ எந்தக் காலமும் பொற்காலம் அல்ல. மக்களின் உண்மையான பொற்காலம் கடந்த காலத்தில் இல்லை. அது எதிர்காலத்தில் தான் இருக்கிறது. – நாட்டுக்கு ராசா மாறுனாலும் தோட்டிக்கு பொழப்பு மாறலே!

கடவுளர்களில் மிகப் பிரபலமானவர் இந்திரன். ரிக் வேதத்தில் அதிக எண்ணிக்கையிலான பாடல்கள், சுமார் 250 பாடல்கள், இந்திரனை விளித்தே பாடப்பட்டு இருக்கின்றன. அடுத்து 200 பாடல்கள் கொண்ட அக்னி. அடுத்து சிவன் சூரியன். இன்று அரசியலில் முக்கிய பங்கு வகிக்கும் விஷ்ணு, ரிக் வேதத்தில் ஒரு சிறிய கடவுள்! மூலத்தில் 24000 செய்யுள்களைக் கொண்டதாக இருந்த மகாபாரதம், இன்று ஒரு இலட்சம் செய்யுள்களைக் கொண்ட பெருங்காவியம். பகவத் கீதைப்படி 4 சாதிகள், மனுதர்மத்தில் 61 சாதிகள், குப்தர்களுக்குப் பிந்தைய புராண நூல்களில் 100 சாதிகள். இந்தத் திணிப்புகள் எல்லாவற்றிற்கும் பின்னுள்ள சமூக நிலைகளை அருமையாக விளக்குகிறது இப்புத்தகம்.

இந்திரன் அக்னி வருணன் என்று இயற்கையை வழிபட்டு வந்த வேதகால மதம், ஏன் மிகப் பெரிய கோவில்கள் கட்டி உருவ வழிபாட்டிற்கு மாறியது? மந்திரம் ஓதுகிறவர்கள் ஏன் சாதியை உண்டாக்கினார்கள்? அதை மந்திரிமார்கள் ஏன் கெட்டியாகப் பிடித்துக் கொண்டார்கள்? வர்ணாசிரம தர்மத்தை மீறி வைசியர்களான குப்தர்களால் சத்திரியர்கள் போல் எப்படி அரசாள முடிந்தது? அனைத்து அதிகாரங்களும் பொருந்திய மன்னன் மேல் அதிகாரம் செலுத்தும் அதிகாரத்தைப் பிராமண வர்க்கம் எப்படி பெற்றது? பூசாரிகள் எதற்குத் தோன்றினர்? துறவறமும் ஆசிரமமும் ஏன் தோன்றின? இந்தி வழி சமஸ்கிருதத்தை ஏன் மதவாதிகள் திணிக்கிறார்கள்? அகழ்வாய்வுகள் உலோகங்கள் நாணயங்கள் போன்ற ஆதாரங்களுடன் பேசுகிறது இப்புத்தகம். கலியுகம், பக்திக் கோட்பாடு, சிலை வைக்கப்படும் கர்ப்பக்கிருகம், கடவுளுக்குப் பலி போன்றவற்றிற்குச் சரியான பின்னணியைச் சொல்கிறது இப்புத்தகம். இதுவரை நீங்கள் கருதிக் கொண்டிருக்கும் சில உண்மைகளை அசைத்துப் பார்க்கும் புத்தகம் இது.

குடுமி திருகி இரண்டாக உடைக்கப்பட்டு கருவறையில் கடவுளர்களுக்குப் படைக்கப்படும் சாதாரண தேங்காய்க்குப் பின் கூட இருக்கிறது ஆயிரங்கால அடக்குமுறை வரலாறு! ஆசிரியர் சொல்வது போல் பொற்காலத்தை எதிர்காலத்தில் அமைக்க கடந்தகாலக் கொடுமைகள் அறிவோம். இல்லையேல், மேல் வர்க்கங்களால் மட்டுமே தீர்மானிக்கப்படும் வரலாறு என்ற இந்தப் பைத்தியக்கார விடுதி, நம் முன்னோர்களுக்குக் கொடுத்த அதே பழைய கொடுமைகளையே நமக்கும் நமது சந்ததிகளுக்கும் திருப்பித் திருப்பிக் கொடுத்து சிரித்துக் கொள்ளும். ஏற்கனவே இருப்பவர்களைக் கருவறைக்குள் விடாமல் வெளியேறிப் போனவர்களைத் திரும்பி வரச் சொல்லி கூவுவதைப் போல!

– ஞானசேகர்
(http://jssekar.blogspot.in/)

Advertisements