174. Ibis Trilogy

How was it possible that a small number of men, in the span of a few hours or minutes, could decide the fate of millions of people yet unborn? How was it possible that the outcome of those brief moments could determine who would rule whom, who would be rich or poor, master or servant, for generations to come?

Nothing could be a greater injustice, yet such had been the reality ever since human beings first walked the earth.

– Flood of Fire நூலிலிருந்து

போரும் போர் சார்நத கதைகளையும் சொல்வதிலும் கேட்பதிலும் அலாதியான உள்மன ஆசை அனைவருக்குள்ளும் ஒளிந்திருக்கிறது. அதனால்தான், மகாபாரதம் தொடங்கி உலகப்போரைப் பேசும் ஆயிரம் திரைப்படங்கள் வரை சொல்லச் சொல்ல தீராமல் இன்னமும் ஊறிக்கொண்டிருக்கிறது.

ஆனால் இவை அனைத்திலும் உள்ளதொரு பொது அம்சம், நாயகன் நல்லவன்;  தண்டிக்கப்படுவான்; போராடி மீண்டு வந்து போரிட்டு வெற்றி சூட, சுபம். எத்தனையோ திரைப்படங்தளில் பார்த்த ஃபார்முலாதான். ஆனால் நிஜ வாழ்க்கை எப்போதும் அப்படி அமைந்து விடுவதில்லை. நல்லனாக இருப்பதின் விலை சில நேரங்களில் மிக அதிகம். அதிலும் போர் என்று வந்துவிட்டால் “Everything is Fair”.

முடிவில் வென்றவன் எழுதுவதே வரலாறு. தோற்றவன் அந்த வரலாற்றில் தோற்பதற்காகவே படைக்கப்பட்டிருப்பான். ஆனால், தோற்றவன் எழுதினால் வரலாறு எப்படி இருந்திருக்கும்? அமிதவ் கோஷ் இந்த கேள்விக்கு தன் அசாத்திய படைப்பாற்றலால், 1720 பக்கங்களில் விடைசொல்கிறார் இந்த Ibis Trilogy-ல்.

————————————————————————————————————————————————————————————————————————————
புத்தகங்கள்: Sea of Poppies / River of Smoke / Flood of Fire
ஆசிரியர்: Amitav Ghosh
வெளியீடு: Penguin Books
பக்கங்கள்: 528 / 568 / 624
வெளியீடு: 2008 / 2011 / 2015
விலை: ரூபாய் 279 / 285 / 332
வாங்கிய இடம்: Amazon.in
————————————————————————————————————————————————————————————————————————————

தமிழில் கசகசா என்றும் ஆங்கிலத்தில் Poppy seeds என்றும் அழைக்கப்படும் ஒரு சாதுவான சமையலறை வஸ்து இரு நூற்றாண்டுகளுக்கு முன் உலக பொருளாதாரத்தை தீர்மாணிக்கும் காரணியாக இருந்தது என்றால் நம்புவதற்கு கொஞ்சம் கடினமாகத்தான் இருக்கிறது. ஆனால் அதுதான் உண்மை. இந்த கசாகசாதான் ஓபியமாக மாறி பாதி உலகை ஆட்டிப்படைத்தது.
அந்த வரலாற்றின் சில கோர பக்கங்களை சாமானிய மனிதர்களின் கதையினூடாக புனைய விழைந்திருக்கிறார் ஆசிரியர்.

Ibis_Trilogy

வரலாற்று புனைவு என்ற நூல் வகை சுவாரஸ்யமான பல சாத்தியங்களுக்கு வழிவகுக்கிறது. வரலாற்றில் விடுபட்டுப்போன கோடிட்ட இடங்களை ஆசிரியர் தன் கற்பனையால் நிரப்பிட உதவுகிறது. ஆனால் அதனை ஒரு தட்டையான வராலாற்றுப் புத்தகமாக ஆக்கிவிடாமல் ரத்தமும் சதையும் கொண்ட மனிதர்களால் நிரப்பிடுவது ஆசிரியரின் சாமர்த்தியம். அதுதான் ஐபிஸ் நூல் வரிசையின் ஆகச்சிறந்த பலமும் கூட. நூல் முழுவதும் வகை வகையாய் அத்தனை பாத்திரங்கள். ஒவ்வாெருவருக்கும் அவருக்கான இடம் உண்டு, முன்கதை உண்டு, ஒரு மொழி நடை உண்டு. மொழியை இத்தனை லாவகத்துடன் கையாண்டதொரு புத்தகத்தை சமீபத்தில் நான் வாசித்ததில்லை. உடையாடல் பகுதிகளின் போது பெரும்பாலான இடங்களில் பேசுவது யார் என்ற குறிப்பு வெளிப்படையாக இருப்பதில்லை. ஆயினும், அதனைப் புரிந்து காெள்வது கம்ப சித்திரமாகவும் இல்லை. ஒவ்வாெரு பாத்திரத்தின் பின்புலத்திற்கு ஏற்ப , மொழியும் ஒரு பாத்திரமாகவே பின்னப்பட்டிருக்கிறது.

புத்தகம் முழுக்க ஏராளமான வரலாற்றுத் தகவல்கள் கொட்டிக்கிடக்கின்றன. ஒவ்வொரு தகவலும் ஆச்சரியம், ஓபியம் தயாரிக்கும் தொழிற்சாலையின் இயக்கத்தை விவரிப்பதிலிருந்து. கடல்கடந்து ஒரு மலரைத்தேடியலையும் தேடலையும், கிழக்கிந்திய காலத்து கொல்கத்தாவையும் முதல் ஓபியம்  போரையும் அருகிலிருந்து பார்க்கும் உணர்வைத் தருகின்றன அமிதவின் வருணனைகள்.

கசகசா விளையும் கங்கைச்சமவெளியில் தொடங்கி, ஏற்றுமதி செய்யப்படும் கொல்கத்தா வழியாக விற்பனைக்குச் செல்லும் மக்காவினை(Macau) வந்தடைகிறது. இறுதியில் முதல் ஓபியம் போரும் அதன் விளைவுமாக முடிவுறுகிறது.  இதற்குள் ஒரு சிக்கலான வலைப்பின்னலைப்போல ஒவ்வொருவரின் பாதையும் மற்றவரினால் குறுக்கிடப்பட்டு திசைதிரும்பி, திசை திருப்பபட்டு  ‌அனைத்தையும் ஒரு போர் புரட்டிப்போடுகிறது.   இக்கதையை ஒரு பக்கத்தில் குறுக்கிட விழைவது ஒரு அபத்த முயற்சியெனப்படுவதால் இத்துடன் நிறைத்துக்கொள்கிறேன்.

நூறாண்டுகள் கடந்த பின்னும் இப்புத்தகத்தின் பல பகுதிகளை இன்றைய நிகழ்வுகளுடன் பொருத்திப்பார்க்க முடியும். ம‌னித மனத்தின் பேராசைகளும் , போரும் இருக்கும் வரையில் இப்புதகம் எழுப்பும் கேள்விகளும் தொடர்புடையதாகவே இருக்கும்.

Ibis Trilogy – நிச்சயம் தவறவிடக்கூடாத வாசிப்பனுபவம்.

– Bee’morgan

(http://beemorgan.blogspot.in/)

Advertisements